РУСИНЫ - книга діла русинської молодежі Мадярщины

Каждый народ має свою оригіналну културу, традиції и свуй язык, дякувучи котрым сохраняє свуй идентитет. Русины є особенным народом, бо сохранив своє културноє наслідіє и свуй язык, не мавучи нигда свої державы. Русины на протяженію столітій подвергали ся асимілації из бока тых держав, у котрых жили и живуть. Слідствієм сього у перву очередь є вто, ош у многых русинськых родинах молодеж вадь мало знає исторію свого коріння, вадь совсім її не знає, не говорячи про русинськый язык. Так склало ся исторично и політично. Вуд 90-х рокув XX ст. зачав ся новый русинськый ренессанс. Державы, у котрых жили и живуть русины, стали булше вниманія уділяти етнікуму, позад сього націоналні меншины дустали можность розвивати свою културу и традиції, што є хуже хосенным діла ушыткых народув. Так є на днишній день у Мадярщині. У многых родинах молодеж дашто знає про своє походжіня вуд родичув. Мы дораховали составити сисю книгу из тов цілёв, обы молодоє поколіня русинув Мадярщины могло булше дознатися про славных представителюв русинського народа, котрі внесли цінный вклад у світову културу и науку и могли бы гордитися тым, ош принадлежать ид сёму богобойному, чесному, талантливому народу.

Книга написана на двох языках, обы її могла прочитати и мадярськоязычна молода генерація. Бо є общезнамым фактом, ош русины и мадяре мавуть сполну тысячелітню исторію, много сполных традицій. У книзі мож найти дані про села из русинськыми традиціями, котрі находять ся у разных містах на території Мадярщины. Думаєме, ош молоді люди будуть булше цінити духовну културу, богаті традиції и усе памнятати, ош „Мы русины – неба сыны”, и ош „Я русин был, єсмь и буду”.

ПРОЧИТАТИ КНИГУ