Вызнамні поставы русинської исторії, літературы и културы

Честовані читателі!

Вы держите у руках книжку, котра представляє нашых знамых великых предкув, котрыми гордяться русины світа. Матеріалы сього зборника печаталися у разных выданях, котрі появилися у послідні 20 рокув у час русинського ренесанса III. Кажда публікація є дорогоціннов діла днишньої генерації, є тым невычерпным жерелом, из котрого она може познати нашу исторію, културу, традиції. У зборнику я старалася хронологічно подати информацію про діятелность вызнамных особностей, обы мож было прослідити у часі тот огромный вклад, котрый они внесли у розвитіє русинства. Думаву, ош матеріалы зборника будуть хосенні и діла урокув русинської літературы и исторії, котрі факултативно проводяться у школах на Подкарпатю и у многых русинськых школах у другых державах. Сочасна русинська молодеж накониць дустане представленіє про русинську интелігенцію, котра училася у разных універзитетах Европы у Празі, Будапешті, Братіславі, Варшаві, Новому Саді и у другых містах. Представителі її были высокопрофесіоналными спеціаліс-тами, неординарными личностями, котрым у силу політичных событій прийшлося не раз адаптоватися до новых режимув. Зборник содержить матеріалы про знамых представителюв церквы, про політикув, писателюв, поетув, філозофув, художни-кув, музыкантув, фолклористув, педагогув, историкув, подвижни-чеськоє житя котрых є приміром діла нас. И йсе далеко не про ушыткых. Думаєся, ош из часом мож буде сись зборник доповнити другыми именами. Маю также наміреніє изобрати матеріал про сочасных русинськых діятелюв, котрі стояли у вытокув русин-ського ренесанса у 90-х роках XX стороччя, отстоюючи свою націоналность, материнськый язык, културу, традиції. Дякувучи їм, мы можеме воскресити нашоє богатоє, дорогоцінноє прошлоє, жити проблемами теперішнього часа, позирати у будучность из великов надеждов. Дякуву ушыткым авторам, статі котрых послужили увіковіченю памняти наших великых предкув.

Др. М. Лявинец

ПРОЧИТАТИ КНИГУ