У 2002 роцї сьме засновали Русинськоє Націоналноє Самосправованя у Вацови из цїлёв захраненя й змуцненя нашоі хрупкої русинськоі идентіти. Она хрупка, бо русины немавуть Утцюзнины. Уєдно из тым, для пудтрымки нашой русинськуй самосвідомости туй, у Карпатському базенї, ми дустаєме повну пудпору уд Мадярської Державы и інклюзивнусть уд мадярського суспільства. Про йсе свідчит и сосполноє русинсько-мадярськоє існованя понад 1000 рокÿв.

 

За йсі рокы сьме зреалізовали вельо проєктÿв изъязаних из русинством, многі из котрых стали традицїйныма. Так-ги приміром орґанїзація реґуларных творчых таборÿв, пудтрымка містнуй русинськуй молодежи стипендіями, вадь створеня колекціи русинського вытварного кумшта у Вацови.

 

Єдно из нашых пуслїдньых майвыдатних досягнень – йсе засновання у 2019 рокови Націоналноі Преміи за Русинськый Кумшт им. Ивана Манайла „Pro Arte Ruthenorum” довєдна из Світовым Конґресом Русинÿв. Цїлёв заснованя преміи є пудпорованя и награда тых вызнамних сочасних русинськых художникÿв, котрі своим умілськым добытком изробили міморядни выслідкы у захраненя, розвуй и пропаґацію світового русинського кумшта.

 

Уд самого зачатка головов Русинського Націоналного Самосправованя у Вацови є Андрея Ілько, а позад резултататув выборÿв 2019 рока, депутатами стали ище и Иван Теодор Манайло та Єва Ласловний Кіш.

 

Обы ищи май эфективно сприяти захраненьови традицій нашого любого русинського нарÿда, сокоченю и гÿдному продовженёви та популаризаціи нашых матеріалных та інтелектуалных културних скарбÿв, ми також створили  сьме и сисю вэб-сторонку. Бажаєме приємного та змістовного перегляда.

 

Уєдно из тим, честовно чекаєме ушиткых русинÿв авадьо тых, ко ся цїкавит нашов културов на нашых заходах, и такой вітаєме ваші онлайн-заявки.

 

Из честованям, Андрея Ілько

​