РУСИНСЬКА КУЛТУРА И ВСОКОЧЕНЯ СОКТАШŸВ
Честуєме вас на културно-просвітителскуй веб-сторонці русинської общины вариша Вац
ПРО САМОСПРАВОВАНЯ
У 2002 роцї сьме засновали Русинськоє Націоналноє Самосправованя у Вацови из цїлёв захраненя й змуцненя нашоі хрупкої русинськоі идентіти. Она хрупка, бо русины немавуть Утцюзнины. Уєдно из тым, для пудтрымки нашой русинськуй самосвідомости туй, у Карпатському базенї, ми дустаєме повну пудпору уд Мадярської Державы и інклюзивнусть уд мадярського суспільства. Про йсе свідчит и сосполноє русинсько-мадярськоє існованя понад 1000 рокÿв.
КО ТАКІ РУСИНЫ?
Русины — славянскый етнос, прожывавучый звекша у Централнуй Європі, найме на Пудкарпатю, айбо они такой мавуть значні сполности у США, Канадї и другых с крайинах. Перебігом своюй исторіи они ся наражали из многыма проблемамы, залучно економичнї тяжкости, позад котрых многі завхабили свою отцюзнину. Русины познамі пуд рузныма именованями, и они говорять на самостойнуй словянськуй бисїдї, и у многых штатох они вызнатї самостойнов націоналнов меншынов. Історично русины прияли христіанство и пудтримовали особі взаимины из славянськыма апостолами, братями Кирилом и Мефодіём. Язык и култура русинӱв ся находят пуд угрозов асімілаціи, непозеравучи на вто, ош они суть єдним из древньих народӱв Централнуй Європы.
ПУБЛИЧНОЄ СЛУХАНЯ
ПОКЛИКАНЯ
12 децембра 2024 рока (четвирь) у 14:00 Русинськоє Націоналноє Самосправованя Ваца проведе публичноє слуханя, на котороє честовно кличу ушытких заимаючых ся.
Місто стрічи: Мерія Ваца / конференц-зала № 124.
Из честованям:
Андрея Ілько, председа
АКТУАЛЇТЫ
Всокотити русинську ідентичность надзвычайно тяжко, уважуючи на вто, ош у русинӱв ниє своюй утцюзнины. Обзиравучи ся на йсе, для нас вызначно не лем сокотити и указовати жыві сокташі и културу в контекстї акцій, концертӱв и выставок, айбо и створёвати и ширити писанї зберьки, рефлектовучі и передавучі русинську исторію, културу и сохташі. Завто нашоє самосправованя приділят великый позур выданю русинськых тематичных публикацій, котрі давуть повный образ наших русинськых сохташув, исторіи и културы. На сюй сторонці годни сьте дустати стямленя про сисі выданя, котрі мы из гордостёв опубликовали, авадь выданя которых подпоровали сьме. Мы ся надієме, ош сяким чином вы годни будете стати ищи май ближе ид нам и глубже порозуміти наш русинськый ідентітет и културу.
ГОЛОШЕНЯ ПРО ТЕНДЕР
ПРЕМІЯ
Світовый Конгрес Русинув довєдна из Русинськым Націоналным Самосправованям вариша Вац (Мадярщина), рішенём засіданя депутатув засновало Націоналну премію за русинськый кумшт им. Ивана Манайла – „Pro Arte Ruthenorum”.
Из фондацієв сиї преміи, внесли сьме ищи єден принос у націоналноє возроженя русинӱв, у розвой и популаризацію по цілому світови нашої необычайно богатої и унікалної русинської културы.
Петро Фёлдеші
– Лавреат премії имени Ивана Манайла „Pro Arte Ruthenorum” - 2023.
„Премія «Pro Arte Ruthenorum» занимать окремішньоє місто у моюм сирдцю, завто бо русинськый язык – муй рудной язык, и коли русины выражавуть своє честованя сив наградов, эсе має для мене выдїлноє значеня.
Для кождого чоловіка, неудлично од того, чим ся вун занимать, важный непрестанный розвой и намаганя ид самореалізаціи, завто для мене сися награда – не лем вызнаня, айбо и своякый аванс для мого подалшого творчого розвоя. Красно дякуву!"
– Петро Фёлдеші
Націонална премія за русинськый кумшт им. Ивана Манайла
„Pro Arte Ruthenorum – 2025”.
Русинськоє Націоналноє Самосправованя варыша Вац довєдна из Світовым Конґресом Русинӱв из гордостёв оглашує тендер на изысканя преміи имени Ивана Манайла «PRO ARTE RUTHENORUM – 2025».
Цїлёв заснованя преміи є пудпорованя и награда тых вызнамних сочасних русинськых художникÿв, котрі своим умілськым добытком изробили міморядни выслідкы у захраненї, розвуй и пропаґацію світового русинського кумшта.
Чекаєме на номінаціи талантӱв, удданых русинськуй културі!
Русинськоє Націоналноє Самосправованя варыша Вац
оглашує тендер на ДОСТАНЯ СТІПЕНДІЇ НА ШКОЛОВАНЯ
на 2024-2025. школный рук.
ПРЕМЄРА ФІЛМА-ПОРТРЕТА НА ДУНА ТВ
"Художник Андрій Манайло: Уд Русинського Коріня - Ид Абстракціи"
Удкрыйте для ся умілську творчёсть Андрія Манайла – знамого русинського маляря та ґрафіка – єдного из майвыдатних репрезентантув у світі русинського кумшта.
Наш філм-портрет «Художник Андрій Манайло: Уд Русинського Коріня - Ид Абстракціи», премєра котрого была у ефірі мадярської націоналної телевізіи – DUNA TV / Rondó 29.03.2024, понукать зазирнути у жывот и кумшт дінастїи русинськых художникӱв, што обсягать три поколїня, презентувучи путь Андрія Манайла у світї живописа, уд умілецько-промыслового коледжа у Унґварі до меженародного вызнаня.
Годни будете ся дознати, як його роботы іншпіровані русинськов народнов културов и родинными сохташами, и як вӱн испоює традіційні елементы из гляданём модерных форм кумшта, отварявучи діла себе нові можности у скулптурі и абстрактных выразах.
Фільм тыж давать понятя про фундацію преміи имени Ивана Манайла «Pro Arte Ruthenorum», котра пудпорує сочасных русинськых умілцюв, и представлять особні мыслї Андрія Манайла про важность кумшта, ідентичности и творчёго самовыраза.
Дознайтеся бульш за Карпато-русинську културу и ї вплыв на творчёсть Андрія Манайла, из приказованя художника свойима словами за свою родину, про свої іншпірацїи тай про вто, як вӱн изъєднує минувшину из умілецькым языком днешности.
